Seri Vizit Penti Miral Dorothy Bolden
![Seri Vizit Penti Miral Dorothy Bolden]()
Fè eksperyans tou sa a an pèsòn oswa sou entènèt.
Fè eksperyans tou sa a an pèsòn oswa sou entènèt.
Seri vizit penti miral la ap fèt an kat pati nan Atlanta, Georgia, pou selebre Dorothy Bolden. Penti Miral yo kouvri kat bilding – yo lokalize nan yon reyon apeprè de kat kilomèt anndan oswa tou pre Vil Vine – yo rakonte diferan pati nan istwa Dorothy Bolden. Nou onore kontribisyon li fè nan mouvman dwa sivil la, efò li fè pou enskri votè ak lidèchip li nan batay pou diyite ak dwa travayè domestik yo.
Pandan ke travay domestik rann tout lòt travay posib ak jwe yon wòl enpòtan nan soutni kay ak ekonomi ameriken an, travay nou an ap sibi devalyasyon ekonomik ak kiltirèl depi twò lontan. Atravè penti miral sa a nou wè zèl yo kòm yon senbòl pouvwa ak enpòtans travayè domestik Nwa. N ap leve lidèchip ak kouraj travayè domestik Nwa yo ki depi plizyè jenerasyon te prepare wout pou mouvman nou an jounen jodi a.
Jodi a, We Dream in Black kontinye ap dirije nan menm vizyon transfòmatif sa a. Nan tout peyi a, manm nou yo ap travay kòm nany, moun k ap netwaye kay ak moun k ap pran swen granmoun aje ak moun ki andikape. Baz manm WeDiB k ap grandi a gen jèn travayè, konsa tou li gen sa ki pi ansyen yo; li gen manm ki fèt Ozetazini konsa tou li gen imigran ki soti toupatou nan dyaspora Afriken an; li gen moun ki gen plizyè idantite sèksyèl ak seksyalite; ak moun ki soti nan diferan klas e ki gen diferan kapasite. Tcheke Ajanda Unbossed la pou aprann plis.
Nan penti miral sa a, Dorothy Bolden kanpe avèk konviksyon epi yon toubiyon galaksi lespas la ap soti anndan l, ki reprezante pouvwa diven ak bon konprann. Sou bò dwat la, l ap bay Gouvènè Jimmy Carter lamen, epi sou bò goch la, yon travayè domestik tan modèn kanpe bò kote l. Sou tou de bò li gen otobis MARTA. Dorothy Bolden te bati pouvwa politik e li te mennen ansanm ak li lòt moun k ap netwaye kay, nani ak moun k ap bay swen ki te konn pran otobis MARTA chak jou pou y al travay; li te konnen tretman rasis yo t ap sibi nan otobis ak nan kay patwon yo, epi li te fè otobis yo tounen espas reyinyon sendika defakto yo, kote li te konn pale ak lòt pasaje sou dwa yo genyen nan travay yo ak sa yo merite. Soti nan refòm sou edikasyon, pou rive nan jistis nan transpòtasyon ak dwa travay, li te gen sousi pou tout aspè nan kominote li a. Jan savan Premila Nadasen te note a “‘otobis libète’ sa yo te konparab ak lekòl libète nan zòn riral yo… kote yo te konn fè edikasyon politik, òganize ak sansiblizasyon.”
Jounen jodi a, nou kontinye ap atenn travayè domestik yo nan estasyon otobis MARTA yo pandan lè trajè yo. Gras ak efò òganize We Dream in Black yo, nou te enskri plizyè milye rezidan Atlanta pou vote epi n ap bati pouvwa politik nan mitan travayè domestik Nwa yo pou transfòme endistri nou an, deranje domaj sistemik yo epi goumen pou gen yon sipò sekirite ak benefis pou kominote nou yo ka pwospere.
Pou moun k ap vizite penti miral yo nan Atlanta, chak kote yo aksesib pa transpò piblik ak estasyon otobis MARTA yo. Pou sipòtè ki andeyò Atlanta yo, rete branche pou yon tou vityèl dirije pa manm lidè nan WeDiB yo.
“Penti miral sa a enpozan epi li vibran, menm jan ak mo Dorothy Bolden te pwononse yon fwa. Nou onore kontribisyon ak istwa endenyab fanm ekstraòdinè sa a.” – Charity Hamidullah
Dorothy Bolden te konn eksplike jan li te renmen travay li ak tout divès wòl travayè domestik yo jwe andedan espas travay la. Epitou li te kwè respè, kondisyon travay desan ak salè jis te fè pati entegral objektif dwa sivil ak mouvman travayè domestik yo. Sa a kòmanse nan bay wòl esansyèl moun kap bay swen yo valè.
Jodi a, pandemi an montre nou kijan swen esansyèl nan fonksyonman sosyete ak ekonomi nou an. Li fè limyè tou sou defi nou rankontre nan fè travay sa a. Antanke travayè esansyèl, moun k ap bay swen yo merite travay nan yon ekonomi ki pran ka yo tou. Pandan n ap rebati ekonomi nou an, se yon moman kritik epi ijan pou nou asire ke tout travayè domestik yo benefisye pwoteksyon yo merite. Travay nan domèn swen ta dwe de bon travay. Envesti nan bon jan djòb vle di ke tout moun ka gen aksè ak swen yo merite, enkli moun k ap pran swen lòt moun yo.
Kòm Madam Kay, yon manm WeDIB ki nan mitan Georgia te note, “Mwen fyè dèske m se yon travayè domestik. Mwen se yon moun esansyèl epi mwen soti nan yon fanmi ki gen yon long eritaj moun k ap bay swen. N ap goumen pou nou bati yon pi bon avni pou tèt nou ak pitit nou yo.”
Mizajou septanm 2022: Miral sa a pa nan kote sa a ankò.
“Chèche Konnen Madam Bolden, pa bò isit. Li pral ede w.”
Doktè Martin Luther King ak lidè Student Nonviolent Coordinating Committee (Komite Kowòdinasyon Etidyan San Vyolans (SNCC) te konn di souvan lè òganizatè yo te vle bati pi gwo pouvwa lejislatif ak politik avèk kominote ouvrye Nwa nan Sid la. Dorothy Bolden te konnen ke dwa sivil ak ekonomik yo te konekte epi ke yo dwe bay travay travayè domestik yo valè ak rekonèt yo kòm eleman esansyèl nan mendèv la.
Men, istwa Dorothy Bolden ak reyalizasyon estratejik li yo merite plis vizibilite.
Lokalize nan Vil Vine, kote Dorothy Bolden te grandi ak elve pwòp fanmi pa l, penti miral sa a te konsevwa nan lide pou leve istwa li ak montre kontribisyon li te fè nan mouvman dwa sivil la, efò li te fè pou enskri votè ak lidèchip li nan batay pou diyite ak dwa travayè domestik yo. Madam Bolden se yon lejand nan Vil Vine epi se te yon katalizè nan kominote li a. Se te yon fanm òdinè nan katye a ki te deside fè yon chanjman epi li te pran lapawòl. Li se yon figi kache ke anpil moun pa konnen.
Penti Miral sa a selebre lavi li ak tout reyalizasyon li te fè pandan tout ane yo epi li demontre jan devouman li te transfòme mouvman travayè domestik yo. Jodi a, nou konnen Lespri Dorothy Bolden toutotou nou. Lespri li ap viv nan manm ak lidèchip We Dream in Black. Nou onore tradisyon long ak pwisan travayè domestik Nwa yo genyen nan òganize pou garanti jistis ak diyite – nan espas travay la ak nan sosyete a anjeneral, ak wòl esansyèl fanm Nwa travayè domestik nan Sid la genyen, epi kontinye ap jwe, pou pote chanjman nan peyi sa a.
